O pastelón de Cedeira xorde a raíz dunha fusión entre empanada e pastelón. A receita orixinal do Forno Arribi aparece en 1875, fai case 150 anos. María Arribi, a actual propietaria, forma parte da familia que comezou a elaborar este orixinal manxar. Os seus antepasados foron os que iniciaron este negocio familiar, que agora ela continúa formando parte da sétima xeración.

A orixe desta tradición está no “Tío Bernardo”: o avó do tataravó de María Arribi. Empezou a facer empanadas e a distribuílas por toda a comarca. Chegou a adquirir unha grande fama grazas a este produto, que xa daquela era diferente das habituais empanadas: tiña diferente masa, gran consistencia... Por tanto, a creación do pastelón debeuse a unha evolución lóxica da empanada. A receita foi cambiando e evolucionando co paso do tempo ata chegar a ser tal e como o coñecemos hoxe en día.

Ao longo do século XX e comezos do XXI, as diferentes xeracións desta familia continuaron transmitindo a fórmula do pastelón. O avó de María Arribi emigrou a Puerto Rico, e foi aí cando comeza a existir esta fusión entre a empanada e o pastelón. Fernando Arribi, pai de María Arribi, foi quen decidiu poñer á venta o produto coas características que mantén na actualidade. Este negocio continúa hoxe nas mans de María Arribi Barcia e do seu marido, Manuel Villar Álvarez.